ಪಿಕೆಎಲ್ 2021: ತಮಿಳು ತಲೈವಾಸ್ ಗುದ್ದಿ ಕೆಡವಿದ ಬೆಂಗಳೂರು ಬುಲ್ಸ್!

 

ಬೆಂಗಳೂರು: ಬೆಂಗಳೂರಿನ ವೈಟ್ ಫೀಲ್ಡ್ ನಲ್ಲಿರುವ ಶೆರಟಾನ್ ಗ್ರ್ಯಾಂಡ್ ಸ್ಟೇಡಿಯಂನಲ್ಲಿ ಶುಕ್ರವಾರ (ಡಿಸೆಂಬರ್ 24) ನಡೆದ ಪ್ರೊ ಕಬಡ್ಡಿ ಲೀಗ್ (ಪಿಕೆಎಲ್) 8ನೇ ಪಂದ್ಯದಲ್ಲಿ ತಮಿಳು ತಲೈವಾಸ್ ವಿರುದ್ಧ ಬೆಂಗಳೂರು ಬುಲ್ಸ್ 38-30ರ ಜಯ ಸಾಧಿಸಿದೆ. ಆರಂಭಿಕ ಪಂದ್ಯದಲ್ಲಿ ಯು ಮುಂಬಾಕ್ಕೆ ಶರಣಾಗಿದ್ದ ಬುಲ್ಸ್ ಮತ್ತೆ ಗೆಲುವಿನ ಲಯಕ್ಕೆ ಬಂದಿದೆ.

ಆರಂಭಿಕ ಪಂದ್ಯದಲ್ಲಿ ಮಂಕಾಗಿದ್ದಂತೆ ಕಂಡ ಬೆಂಗಳೂರು ಬುಲ್ಸ್ ನಾಯಕ ಪವನ್ ಕುಮಾರ್ ಶೆಹ್ರಾವತ್ ಈ ಪಂದ್ಯದಲ್ಲಿ ಕೊಂಚ ಚೇತರಿಕೆಯ ಆಟ ನೀಡಿದ್ದು ಕಂಡುಬಂತು. ಪವನ್ 9 ರೈಡ್ ಪಾಯಿಂಟ್ಸ್ ಸೇರಿಸಿದರೆ ಮತ್ತೊಬ್ಬ ಆಟಗಾರ ಚಂದ್ರನ್ ರಂಜಿತ್ 7 ಅಂಕಗಳ ಕೊಡುಗೆ ನೀಡಿದರು. ಇನ್ನು ಬುಲ್ಸ್ ನಿಂದ ಸೌರಭ್ ನಂದಲ್ 5, ಭರತ್ 5, ಅಮನ್ 3, ಮಯೂರ್ ಕದಮ್ 3, ಮಹೇಂದರ್ ಸಿಂಗ್ 1 ಅಂಕ ಕಲೆ ಹಾಕಿದರು.

ತಮಿಳ್ ತಲೈವಾಸ್ ಪರ ಭವಾನಿ ರಜಪೂತ್ 8, ಸಾಗರ್ 5, ಮಂಜೀತ್ 4, ಸುರ್ಜೀತ್ ಸಿಂಗ್ 3, ಕೆ ಪ್ರಪಂಜನ್ 3, ಮೋಹಿತ್ 2, ಸಾಹಿಲ್ ಸಿಂಗ್ 1, ಹಿಮಾಂಶು 1 ಅಂಕಗಳ ಕೊಡುಗೆ ನೀಡಿದರು. ಪಂದ್ಯದ ಆರಂಭದಲ್ಲಿ ಇತ್ತಂಡಗಳ ಮಧ್ಯೆ ಜಿದ್ದಾಜಿದ್ದಿಯ ಆಟ ನಡೆಯಿತಾದರೂ ಫಸ್ಟ್ ಹಾಫ್ ವೇಳೆ ಬುಲ್ಸ್ ಲೀಡ್ ಪಡೆದುಕೊಳ್ಳಲಾರಂಭಿಸಿತ್ತು. ಅಂತಿಮವಾಗಿ 8 ಅಂಕಗಳ ಅಂತರದಿಂದ ಬೆಂಗಳೂರು ತಂಡ ಸೀಸನ್ ನ ಚೊಚ್ಚಲ ಗೆಲುವು ದಾಖಲಿಸಿದೆ.

ಈ ಪಂದ್ಯದ ಬಳಿಕ ಬೆಂಗಳೂರು ಬುಲ್ಸ್ ತಂಡ 2 ಪಂದ್ಯಗಳಲ್ಲಿ 1 ಗೆಲುವಿನೊಂದಿಗೆ 5 ಅಂಕ ಕಲೆ ಹಾಕಿದೆ. ಪಾಯಿಂಟ್ಸ್ ಟೇಬಲ್ ನಲ್ಲಿ ಬೆಂಗಳೂರು 6ನೇ ಸ್ಥಾನದಲ್ಲಿದೆ. ಆಡಿರುವ 2 ಪಂದ್ಯಗಳಲ್ಲಿ ಎರಡೂ ಪಂದ್ಯ ಗೆದ್ದಿರುವ ದಬಾಂಗ್ ಡೆಲ್ಲಿ ತಂಡ 10 ಪಾಯಿಂಟ್ಸ್ ನೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿದೆ.